Қызылордада туған інісінің 11 жасар қызын зорлаған педофил сотталды

Zakon.kz

Мұндай қылмыс жасағандарды мемлекет аяусыз жазалайды - 20 жылға дейін немесе өмір бойына бас бостандығынан айырады.

Қызылорда облысының қылмыстық істер жөніндегі мамандандырылған ауданаралық сотының жабық сот отырысында 43 жастағы сотталушы, педагог Қ.Б.-тің қылмыстық ісі қаралды. ҚР ҚК-нің 121-бабының 4-бөлігімен айыпталған Қызылорда қаласының тұрғыны педагогикалық қызметпен және кәмелетке толмағандармен жұмыс істеуге байланысты қызметтерді атқару құқығынан өмір бойына айырыла отырып, 15 жылға сотталды. Бұл туралы ҚазАқпарат мемлекеттік айыптаушы-процесс прокуроры Сая Темірбековаға сілтеме жасай отырып хабарлады.

Сотталған Қ.Б 11 жастағы қыздың дәрменсіз күйін пайдаланып, күш қолданып, бірнеше рет сексуалдық сипаттағы зорлық-зомбылық іс-әрекеттерін жасаған. Атап айтқанда, сотталған 2015 жылдың желтоқсан айында және 2017 жылдың 1 қаңтарында туған інісінің үйіне қыдырып келіп, інісінің 11 жасар қызына күш қолданып, табиғи емес нысанда жыныстық қатынас жасап, жыныстық құмарлығын қанағаттандырған. Жәбірленуші жасына сәйкес, сотталушыға қарсылық көрсете алмаған.

Аузынан ана сүті кеппеген баланы зорлау - нағыз азғындық. Мұндай қылмыс жасағандарды мемлекет аяусыз жазалайды - 20 жылға дейін немесе өмір бойына бас бостандығынан айырады. Олардың жазасы жеңілдетілмейді. Сотталғандар мерзімінен бұрын босатылмайды, оларға рақымшылық жасау туралы заң қолданылмайды, ешқандай процестік келісім жасалмайды. Сотталғандар жаза мерзімін толық өтейді. Айта кетейік, статистика бойынша, әлемде 2 минут сайын 1 бала жыныстық зорлық-зомбылық көреді. Әрбір үшінші қыз 18-ге толғанша осындай жыныстық тиісуге ұшырайды екен.

Фото: inform.kz