Бразилияда адамдардың еркін шектеп, еңбегін қанап келген 340 компанияның заңсыз әрекеті әшкере болды, деп хабарлайды 24.kz
Олардың былығын жергілікті Reporter Brazil құқық қорғау ұйымы ашқан. Белсенділер жүргізген тергеудің нәтижесінде елдің Еңбек министрлігі құлдықта болған тұрғындарды босатып, оларды қанаған компанияларға айыппұлдар мен белгілі бір мерзімге дейін әр түрлі санкциялар салды. Аталған мекемелер жұмысшыларды адам төзгісіз жағдай мен қорлықта ұстап, еңбектері үшін мардымсыз ақша төлеген, тіпті кейбірін мүлде ақысыз қалдырған. Бұдан басқа, жұмыс берушілер мойнында қарызы бар адамдарды еркінен тыс жұмысқа жегіпті. «Қара тізімге» кірген кәсіпорындар негізінен киім тігу, мал өсіру, отын дайындау және құрылыс жүргізу сияқты істермен айналысқан. Айта кеткен жөн, Бразилия билігі 1995 жылы адам еңбегін қанаудың барын мойындаған болатын. Сол кезден бері ресми мәлімет бойынша 50 мыңға жуық тұрғын құлдық қамытынан құтқарылған.
Фото:namba.kz