Сарыағаштың 28 жастағы тұрғыны ұрлап кеткен көлікпен жол апатына ұшырады. Абай полиция бөліміне Самал-з шағынауданының тұрғыны хабарласып, көмек сұрайды. Ол азаматтың айтуынша, Мерседес көлігін белгісіз біреу мініп кеткен екен, деп хабарлайды otyrar.kz.
Арада бірнеше минут өткенде полиция қызметкерлері сипатталған көлікке ұқсас Мерседесті қала көшелерінің бірінен байқап, тексермек болады. Бірақ, жүргізуші тоқтау нұсқауына бағынбай, қаша жөнелген. Сол күні алдынан шыққан Нексия көлігін соғады.
Соңынан келген полицейлер көлікті басқарып отырған адамды ұстап алды. Ол 28 жастағы Сарыағаш тұрғыны екен. Ал Мерседес сол ұрланған көлік болып шыққан.
Болған жайтты анықтау үшін полицейлер күдіктіні Абай полиция бөліміне алып барды. Сот сараптамасы нәтижесінде көлік ұрлаған жігіттің орта дәрежеде мас екені анықталды.
Тергеу барысында ол жолдың шетіне келіп тоқтаған көлікті байқағанын айтты. Иесі дүкенге кіріп кеткенде жүгіріп барып, кілтті тексерген. Жүргізуші дүкенге тез кіріп-шығамын десе керек, кілтті қалдырып кетіпті. Осыны байқаған мас азамат Мерседесті мініп кеткен.
Қазір осы факті бойынша қылмысты кодекстің 200-бабына сәйкес іс қозғалды. Сотқа дейінгі тергеу жалғасуда.
Фото: otyrar.kz