Павлодарское ауылы мен Ленин кентіндегі көшелерді еріген қар суы басып кетті, деп хабарлайды pavlodarnews.kz.
Ленин кентінің тұрғындары мұндай қиыншылыққа бірінші жыл тап болып отырған жоқ.
-Не істейміз? Енді резеңке етіктерді сатып алып, судың үстімен жүру ғана қалды,- деп жазды uzakovamaria1 атты желі қолданушысы.
Павлодар қалалық ТЖ басқармасының бастығы Ренат Валишановтың айтуынша, техникалар тәулік бойы жұмыс істеп, мамандар бұл жағдайды үнемі назарда ұстауда.
-Тұрғындар шу көтеріп жатыр. Мен кеше өзім Кенжекөл, Ленин кенті, Павлодарское ауылы мен Мойылдыда болдым. Қауіпті ештеңе жоқ. Бұл - қардың қалыпты еруі. Әрине, азды-көпті жаңбырдың да себебі бар. Су басқан үйлер мен аулалар жоқ. Тек су жиналып қалған аймақтар бар. Қажет болғанда арнайы техникамен сорып шығарамыз, - деді Ренат Валишанов.
Басқарма басшысы атап өткендей, еріген қар суының жиналуына қыс бойы қарды күремеген тұрғындардың өздері кінәлі.
-Әрбір әкімдікте тікелей желі жұмыс жасайды. Ауылдағы азаматтар сол арқылы байланысқа шыға алады. Қазіргі күні су басу қауіпі бар әр ауылда екі арнайы техника мен бір мотопомпа дайын тұр. Қажет болса, қосымша техника іске кіріеді, - деді Ренат Валишанов. Думан Асқарбек
Фото: Рavlodarnews.kz
