ОҚО-да шаруалар үшін арзандатылған жанар-жағармай мөлшері жеткілікті.

Әр ауданда бір оператордан болса, Мақтарал мен Сарыағаш аудандарында екі оператордан бар екен. Арзандатылған жанар-жағармайлар облыстағы 56 жанармай бекеті бойынша таратылуда.

ОҚО-да шаруалар үшін арзандатылған жанар-жағармай мөлшері жеткілікті. Бұл туралы бүгін ОҚО әкімінің орынбасары С.Тұяқбаев ОҚО Аймақтық коммуникациялар қызметінде өткен брифингте хабарлады. Айтуынша, бүгінгі таңда облыста шілде айына бөлінген 13 мың тонна жанар-жағармайдың 3,2 мың тоннасы толық таратылып берілсе, қалған 8,3 мың тоннасына қаражат төленіп, сұйық отын барлық аудандардың ауылдарындағы қоймаларға жеткізілген. Ал жанармай алғысы келген кез келген шаруа, алдымен, өз ауданындағы әкімдікке барып, талон алып, жерінің көлеміне сәйкес, қажет отынды ала алады. Бұл туралы zakon.kz, ОҚО әкімінің баспасөз қызметі берген ақпаратқа сілтеме жасап хабарлайды.

«Қазіргі таңда бұрынғы жүйе жаңарып, шаруалар жаңадан қалыптасқан жүйе бойынша жанар-жағармай алуда. Бізде бұл жұмыстарға қосымша, облыстық кәсіпкерлік басқармасымен бірлесу арқылы, облыстық жанар-жағармай қауымдастығымен және облыстық кәсіпкерлік палатасымен арнайы мониторинг жүргізіліп жатыр. Егер қандай да бір олқылық орын алған жағдайда арнайы құрылған жұмысшы тобымен тиісті шаралар қабылдайтын боламыз», - деді С.Тұяқбаев.

Еске салайық, биыл ауыл шаруашылы саласының орақ ору науқанын жүргізу үшін Үкіметтен 39 мың тонна жанар-жағармай бөлінген болатын. Оның 13 мың тоннасы шілде айына бөлінсе, 12 мың тоннасы тамыз айы үшін қаралған. Ал 14 мың тонна сұйық отынды қыркүйек айында тарату жоспарланған.

Баспасөз мәслихатында облыс әкімінің орынбасары бұл салада өңір бойынша 17 оператордың бар екенін хабарлады. Әр ауданда бір оператордан болса, Мақтарал мен Сарыағаш аудандарында екі оператордан бар екен. Арзандатылған жанар-жағармайлар облыстағы 56 жанармай бекеті бойынша таратылуда. Егер де, шаруа сұйық отынды қоймадан алатын болса 83 теңгеден, ал жанармай бекетінен алса 85 теңге ала алады. Ал жалпы арзандатылған отынның нарықтағы бағасы 99 теңге.

Фото: ontustik.gov.kz