Ертісте 90 жастағы ардагер Бауыржан Момышұлының кітаптарын қолынан тастамайды

Бүгінде қария 90 жастан асқан шағына қарамастан ауылдағы кітапханының тұрақты оқырманы.

Павлодар облысы Ертіс ауданында тұратын 90 жастағы Ұлы Отан соғысының ардагері Бапан Құсайынов егде жасына қарамастан әлі күнге дейін қой бағып, газет-журналдар мен кітаптарды қолынан тастамайды, деп хабарлайды pavlodarnews.kz.

Батыр ардагердің ұлы Асылбек Құсайыновтың айтуынша, Бапан Құсайынов 1944 жылы 17 жасында майданға аттанған. - Әкем үш ай Алматыда танк байланысшысы мамандығын оқып, Беларусь майдан шебінде жауға қарсы күрескен. Соғыс жылдары үш бірдей медальмен марапатталған: «Ерлік үшін», «Берлинді алғаны үшін» және «Германиядағы жеңіс үшін».

Қазіргі уақытта ауылымыздағы сыйлы ақсақалдардың бірі. Той болса, үнемі төрде қонақ болып, жастарға батасын беріп жүреді. Үйімізге «Егемен Қазақстан», «Сарыарқа самалы» газеттері келсе, ең бірінші әкеміздің қолынан өтеді. Өзіміздің азын-аулақ қойларымыз бар еді. Әкем сол қойларды бағып, жем-шөптерін де өзі салып береді, - дейді Асылбек Құсайынов.

Бүгінде қария 90 жастан асқан шағына қарамастан ауылдағы кітапханының тұрақты оқырманы. Абайдың қара сөздері мен өлеңдерін, Бауыржан Момышұлының «Ұшқан ұя», Мұқтар Мағауинның «Аласапыран», Әнуар Әлімжановтың «Махамбеттің жебесі», Әзілхан Нұршайықовтың «Махаббат қызық мол жылдар» кітаптарын сүйіп оқиды. Ол 1926 жылы 26 желтоқсанда Ертіс ауданы Қарақұдық ауылдық округіне қарасты Кеңес ауылында дүниеге келген.

Соғыс аяқталған соң 1951 жылға дейін Польшада болып, аға сержант атағымен елге оралады. 1953-1957 жылдарға дейін тың игеруге қатысқан. 1985 жылы еңбек өтілі бойынша зейнеткерлікке шыққан. 1952 жылы Қараөткел ауылының тумасы Қалима Жакуповамен отау құрып, сегіз баладан 21 немере, 14 шөбере көрген. Батырдың 1960 жылы туған үлкен ұлы Өтеу Құсайынов - Ауған жауынгері. Отан үшін отқа түсіп, қан майданды өткерген қарияның кеудесінде 20-дан астам медаль жарқырап тұр.

Оның ішінде «Ерлік үшін», «Германиядағы жеңіс үшін», «Берлинді алғаны үшін» медаль (1945), «Кеңес әскері мен флоты үшін» (1948), «Ерен еңбегі үшін» (1970), «Маршал Г.Жуковтің медалі» (1997) сияқты марапаттар бар.

Абзал Қабдраш

Фото: Рavlodarnews.kz