Сырдариядан қауіп жоқ, диқанға су жеткілікті

Төмен қарай 1000 текше метр су түсіп жатыр.

Сырдариядағы сең толықтай теңізге жетті, бүгінде дария бойында ешқандай қауіп жоқ. Бұл туралы ҚазАқпарат ХАА Арал-Сырдария бассейндік инспекциясына сілтеме жасап хабарлады.

Бүгінгі таңда «Тоқтағұл» су қоймасында 12 миллиард 770 миллион текше метр су тұр. Одан төмен қарай секундына 362 текше метр су босатылса, «Қайраққұм» су қоймасынан оған секундына 820 текше метр су қосылады. Шардараға келіп жатқан су мөлшері секундына 1200 текше метрді құрайды.

Төмен қарай 1000 текше метр су түсіп жатыр. «Көксарай» су реттегіші қазіргі күні 2 миллиард 800 миллион текше метр суды ұстап тұр. Әлі де 200 миллион текше метр су қабылдауға қауқарлы. Арыс өзенінен секундына 219 текше метр су кеп Сырдарияға құйылуда. Қызылорда су торабынан бұл күндері секундына 521 текше метр су өтіп жатыр.

Ұлы теңізге оның 380 текше метрі жетуде. Наурыз айының соңында дариядағы мұз толықтай теңізге жетті. Сырдарияда бүгінде қауіп жоқ. Сондай-ақ, диқандар қауымы үшін жағымды жаңалық - биылғы егінге су мөлшері жеткілікті болатын түрі бар.

Фото: inform.kz