Павлодарда аяқ киім дүкені өртеніп, 27 адам құтқарылды

Тілсіз жауды ауыздықтауға департаменттен екі звено жұмылдырылды.

Павлодарда Қамзин көшесі, 160 мекенжайы бойындағы көп қабатты тұрғын үйдің бірінші қабатында орналасқан аяқ киім дүкенінен өрт шыққан, деп хабарлайды pavlodarnews.kz.

Облыстық ТЖД-нің мәліметінше, сауда нүктесіндегі әйелдер сөмкелері мен аяқ киімдер тұрған сөрелер жанып, қызыл жалын үш шаршы метр аумақты шарпыған.

Өрт шыққаны туралы хабарлама кеше сағат 19.44-те кезекшілік бөліміне түскен. Сағат 20.44-те толығымен сөндірілген.

- Оқиға орнынан 27 адам сыртқа шығарылды. Оның сегізі – балалар. Дүкен "Разгон" жеке кәсіпкерлігіне тиесілі. Тілсіз жауды ауыздықтауға департаменттен екі звено жұмылдырылды. Зардап шеккендер жоқ. Қазіргі таңда өрттің шығу салдары мен келтірілген шығын көлемі анықталуда, - деді баспасөз қызметінде.

Ақбота Сейсенбаева

Фото: Рavlodarnews.kz