Ақмолалық полицейлер астыртын алтын өндіріп келген шағын цехты әшкереледі. Күдікті Степногорск қаласының жанындағы Ақсу кентінің 33 жастағы тұрғыны болып шықты, деп жазады Хабар 24 арнасы.
Тінту барысында оның қорасынан үгіту аппараттары, электрлі қозғалтқыштар мен алтынды кеннен айыратын сұйықтықтар тәркіленген. Қазір күдіктінің үстінен қылмыстық іс қозғалды. Енді ол 90 күн қамауда отыруы тиіс. Болмаса, 500 айлық есептік көрсеткіш көлемінде, яғни 1 млн теңгеден астам айыппұл төлеуі қажет.
Гүлнәр Пинчук, облыстық ІІД баспасөз хатшысы:
- Күдіктінің бұл заңсыз кәсіппен қанша уақыттан бері айналысып келе жатқаны тергеу барысында белгілі болады. Өткен жылдың өзінде полицейлер осындай 29 астыртын цехтың жұмысына тосқауыл қойып, 100 шақты қылмыстық іс қозғалған болатын.
Фото: 24.kz