Отырыс барысында Қырғызстан Республикасының премьер-министрі Сапар Исаков күтпеген жерден сөз сөйледі. Ол қайтадан қазақ-қырғыз шекарасындағы жағдайға қатысты мәселені көтерді.
Қазақстанның Үкімет басшысы Бақытжан Сағынтаев оның сөзіне жауап ретінде, біздің мемлекетіміздің бұл сұраққа қандай көзқараста екені жақсы белгілі деп атап өтті.
«Қазақстан үкіметі қырғызстандық тараптың пікірімен келіспейді. Аталған мәселе бойынша біздің мемлекеттің ұстанымы баршаға мәлім. Ол Еуразиялық экономикалық одақ елдерінің ортақ экономикалық кеңістігін құру идеологиясына толық сәйкес келеді және Одақтың қатысушы-елдерінің экономикалық шығындары мен қауіп-қатерлерін азайтуға бағытталған», - деді ҚР Премьер-Министрі Бақытжан Сағынтаев Ташкентте өткен ТМД Үкімет басшыларының отырысында қазақстандық-қырғызстандық шекара аумағындағы бақылау мәселелері жөнінде.
«Біз Қырғызстан үкіметін Еуразиялық экономикалық одақ аясындағы өз міндеттерін растауға және Қырғыз Республикасының өз міндеттерін имплементациялауға шақырамыз. Бұл тақырыпты үнемі ашық айтамыз және біздің сөзіміз қырғызстандық әріптестерге жеткенін қалаймыз», - деді Б.Сағынтаев.
Сондай-ақ, Премьер-Министр Қазақстан Үкіметінің қырғызстандық тараптың сындарлы ұстанымына үміт артатынын атап өтті.
Фото: astanatimes.com