СҚО-да бірнеше пәтер тонау әрекетіне күдікті азамат ұсталды

Zakon.kz

Батыр Баян көшесінде тұратын тоналған азаматтардың бірі өздерінің таныстарын жолға шығарып салу үшін жолдасы екеуі бір-екі сағатқа вокзалға барып келгендерін айтады. Ал, үйге келгенде пәтерді тонап кеткенін көрген.

Петропавл қаласының тәртіп сақшылары қалада бірнеше пәтерді тонап кетті деген күдікпен 44 жасар тұрғынды ұстады, деп хабарлайды ҚазАқпарат, Солтүстік Қазақстан облыстық ІІД-не сілтеме жасап.

Петропавл қаласының бірнеше тұрғынынан пәтерлерін тонап кеткендігі жөнінде шағым түскен. Ұры нысанаға алған үйлерге терезе арқылы кіріп, қымбат тондар мен әшекейлік бұйымдарды, ақша мен гаджеттерді қолды етіп отырған. Қылмыс үй иелерінің жұмыста болған уақытында немесе олардың қандай да бір шаруаларымен кетіп қалған кездерінде жасалған. Ұры пласти терезелерді күштеп ашып кіретін болған.

Қалалық ІІБ-ның Қылмыстық полиция қызметінің өкілдері жедел-іздестіру шараларын ұйымдастырды. Соның нәтижесінде Петропавл қаласының 44 жасар тұрғыны ұсталды. Оны тексере келгенде бөтеннің мүлкін қолды еткені үшін бұрын да бірнеше рет сотталғаны анықталды. Ол өзінің ұрлықтарға қатысы барын жасырмады. Қазір оған пәтер тонаудың 7 әрекеті бойынша айып тағылып отыр.

«ҚР ҚК-нің 188-ші бабының 2 бөлімі бойынша (бөтенің мүлкін құпия түрде ұрлады) қылмыстық іс қозғалды. Бұл бап бойынша 5 жылға дейін бас бостандығынан айырылады. Ұсталған күдікті уақытша ұстау оқшаулағышына қамалды»,-деді Петропавл қаласы ІІБ-ның екінші бөлімінің аға тергеушісі Наталья Милешина. Жыл басынан бері СҚО-да 1207 пәтер тонау әрекеті тіркелді.

Ұрлықтарды ашу көрсеткіші 80 пайызды құрап отыр.

Фото: inform.kz