Батыс Қазақстан облысында «Елім менің» жастар коалициясы құрылатын болды

Аталған шараға қатысқан 70 делегат әр түрлі саланың өкілдері.

Орал қаласында «Болашаққа бағдар: жастардың жетістік жолы» аймақтық жастар форумы өтті.

Форумның басты мақсаты – «Рухани жаңғыру» бағдарламасы шеңберінде «Жастар қандай үлес қосып, қай бағытта жетістіктерге жете аламыз?» деген сұрақтар аясында пікір алмасу, мемлекеттік органдарға жастар тарапынан ұсыныс-пікірлер білдіру, шешу жолдарымен бірге жұмыстану.

Шара барысында облыстық жастар ұйымдары атынан сөз алған Жәнібек аудандық «Ақбастау» жастар қоғамдық бірлестігінің төрағасы Р.Нұралиев өңірде «Рухани жаңыру» бағдарламасын іске асыруға жастарды тарту мақсатында белсенді жастар мен жастар ұйымдарын біріктіретін «Елім менің» жастар коалициясын құруды ұсынды.

Аталған шараға қатысқан 70 делегат әр түрлі саланың өкілдері. Оның ішінде республикалық және аймақтық жастар ұйымдары көшбасшылары, жоғары оқу орындары өзін-өзі басқару ұйымдары мүшелері, жас журналистер, атақты спортшылар, танымал блогерлер, еріктілермен қатар, Атырау, Ақтөбе, Маңғыстау облыстары жастар өкілдері де бар.

Форум жұмысына қатысқан облыс әкімі Алтай Көлгінов делегаттарға Мемлекет басшысы Н.Ә.Назарбаев «Болашаққа бағдар: рухани жаңғыру» атты мақаласында «Рухани жаңғыру» бағдарламасының құрамдас бөлігі болып табылатын «Туған жер» бағдарламасы жалпыұлттық патриотизмді, туған жерге, өскен ауылға, қала мен өңірге деген сүйіспеншілікті қалыптастыруға бағытталатынын атап өтіп, әр салада ел дамуына өз үлестерін қосып жүрген Мұхтар Манкеев, Тұрсынбек Қабатов, Алпамыс Шаримов сынды батысқазақстандық жастардың қызметін үлгі етті.

Сондай-ақ, «Жасыл Ел» жастар еңбек жасақтарының республикалық штабы жетекшісі Т.Болысов, «Қазақстан студенттері Алянсы» республикалық қозғалысы көшбасшысы И.Түстікбаев «Рухани жаңғыру» бағдарламасы аясында жаңа жобаларды бірігіп жүзеге асыруға шақырса, жас өнерпаз Мадина Бигалиева тағылымы мол Ақжайық өңіріндегі тарихи орындар туралы мектеп оқушылары мен студенттер үшін смартфондарға арналған арнайы мобильді қосымша, виртуальды электронды өлкетану кітапшасын жасауды ұсынды.