Түркияның оңтүстік-шығысында жүргізілген лаңкестікке қарсы арнайы операция кезінде 20-дан астам содырдың көзі жойылды. Түркия бас штабының мәлімдеуінше, сепаратистік ұйымның 5 мүшесі қаза тапқан, деп хабарлайды 24.kz арнасы.
Оған қоса бірер күн бұрын басталған әскери іс-қимылдар барысында «Күрдістан жұмысшылар партиясының» 23 содыры жер жастанған. Бұған дейін Түркия Ішкі істер министрі елдің оңтүстік-шығысындағы 7 ауданда тәулік бойына коменданттық сағаттың енгізілгенін хабарлаған. Жалпы «Күрдістан жұмысшылар партиясына» қарсы лаңкестік операция Хаккари провинциясында, Шырнақ қаласында және Нусайбин провинциясында жүргізіліп жатыр. 2015 жылы басталған Үкімет пен «Күрдістан жұмысшылар партиясының» қақтығысы салдарынан 5 мыңға жуық содыр мен 350-ден астам полиция қызметкері қаза тапқан.
Фото:24.kz