Көлік полицейлері сомасы 3,5 млн теңгеге жуықтайтын тұрмыстық тауарларды ұрлаған локомотив депосы мен ӘТЖК қызметкерлерін ұстады, деп хабарлайды BNews.kz.
Биылғы жылдың 6 шілдесінде Желілік ішкі істер бөлімінің криминалдық полиция қызметкерлері Достық стансасында жүргізген жедел-іздестіру шаралары барысында 49 бума әйелдің бас киімін жымқырған Шығыс Қазақстан облысы Аягөз ауданының 5 тұрғынын анықтап, ұстады.
Тексеру барысында анықталғандай, ұсталғандар жоғарыда аталған тауарды 4 маусым күні «РЗД-Қарақұм» аралығында «ҚХР-Өзбекстан» бағыты бойынша келе жатқан вагон контейнерінен қолды қылған.
Аталған қылмысқа қатысты күдіктілердің екеуі – локомотив депосы мен әскерилендіріліген теміржол күзетінің қызметкерлері болып табылады.
Келтірілген зиян көлемі - 3 492 059 теңге. Заттай айғақ алынды.
Қазір ұсталған 5 азамат қамауда отыр. Аса ірі көлемдегі ұрлық жасады деген айыппен сотқа дейінгі тергеу жүргізілуде.
Фото: www.mk.ru