Мұғалжар ауданында Қандыағаш қаласындағы бірқатар үй мен мекемені су басу салдарынан төтенше жағдай режимі жарияланды, деп хабарлады ҚазАқпарат ХАА, облыстың ТЖД басшысы Бауыржан Сыздықовтың берген мәліметіне сілтеме жасап.
- Кеше Қандыағашқа бардық. Төтенше жағдайлар бойынша комиссияның шұғыл отырысын өткізіп, Мұғалжар ауданында жергілікті ауқымдағы табиғи сипаттағы төтенше жағдай жарияладық, - деді Б.Сыздықов.
Б.Сыздықовтың сөзіне қарағанда, 23 шілдеде Мұғалжар ауданында қатты жауын салдарынан нормадан 3,5 есе көп жауын-шашын түсті: 22 миллиметрдің орнына - 79 миллиметр.
- 2 су өткізу құрылымын шайып өтті. Бұл көпірлер емес. Су 10 үйдің ішіне кірді, 7 үйден суды шығардық, 3 баспана бойынша жұмыстар жүргізіліп жатыр. 47 ауланы су басты. Алайда Қандыағаш қаласында адам өміріне еш қауіп төніп тұрған жоқ, - деді Б.Сыздықов.
Синоптиктердің хабарлауынша, Ақтөбеде бұл апта жауын-шашынды болмақ.
Фото: inform.kz