Бүгін Қарағандыда шыққан өрттің салдарынан үш адам қаза тауып, тағы екі адам зардап шекті, деп хабарлайды «ҚазАқпарат» ХАА.
«Тілсіз жау түнгі сағат 1:15-те көпқабатты тұрғын үйдің екінші қабатындағы бір бөлмелі пәтерден шыққан. Өрт аумағы 25 шаршы метрді шарпыды», - деп хабарлады Қарағанды облыстық ТЖ департаментінің баспасөз қызметі.
Өрт шыққан пәтерде ешкім болмаған. Алайда, көрші пәтердегі үш адам ыс тиіп көз жұмған.
Тағы екі адам - әйел адам мен 13 жасар бала ауруханаға жеткізілді. ТЖ департаменті өрт сөндіру қызметі мен апаттық-құтқару жұмысының қызметкерлері 19 адамды эвакуациялап, 16 адамды құтқарды, соның алтауы - балалар. Өрттің шығу себебі анықталуда.
Фото: inform.kz