ҚР Бас прокуратурасының Құқықтық статистика және арнайы есепке алу комитеті 2017 жылдың бірінші жартыжылдығында адамдар зардап шеккен жол-көлік оқиғаларының қай өңірде көп тіркелгенін жария етті, деп хабарлайды ҚазАқпарат.
Комитет мәліметінше, жылдың 6 айында еліміздің жолдарында 7 127 жол-көлік оқиғасы орын алып, онда 9 992 адам зардап шексе, 738-і қаза тапқан. Өткен жылдың сәйкес кезеңімен салыстырғанда жол апаты - 10,7, зардап шеккендердің саны - 10,3, қаза тапқандардың саны - 20,5 процентке төмендеуі байқалады.
Ең көп жол апаты Алматы қаласы, Алматы және Оңтүстік Қазақстан облыстарында орын алған. Адам өлімі бойынша Алматы облысы алда тұр. Бұл өңірде 162 адам жол апатында қаза тапқан.
Бірінші жартыжылдықтағы ең үлкен жол-көлік оқиғасы Ақтөбе облысында тіркелді. Жол апаты кезінде 16 адам зардап шекті, оның 9-ы қаза тапты.
Алматы қаласындағы Жандосов пен Манас көшелерінің қиылысы Қазақстан бойынша жол апаты ең жиі орын алатын жер ретінде тіркелген. Дәл осы көшелердің қиылысында жыл басынан бері 9 жол апаты болып, 10 адам зардап шеккен.
Фото: inform.kz